Inama y’Abaminisitiri yo ku wa 14 Ukuboza 2020 yashyizeho ingamba nshya zigamije gukumira ubwiyongere bwa Coronavirus, zirimo ko amasaha y’ingendo ava saa Yine z’ijoro agashyirwa saa Tatu mu minsi ya mbere gato ya Noheli, mu gihe mu bihe by’iminsi mikuru bwo zizaba zibujijwe guhera saa Mbili z’umugoroba kugera saa Kumi z’igitondo.

Mu Karere ka Musanze ho hashyizweho ingamba zihariye zigena ko ingendo zibujijwe guhera saa Moya z’ijoro kugera saa Kumi z’igitondo.

Ijoro ryo ku wa Kabiri nibwo inzego zirimo iz’umutekano n’iz’ibanze zatangiye gukurikirana iyubahirizwa ry’aya mabwiriza.

Mu Mujyi wa Kigali kimwe n’ahandi mu masaha ashyira saa Tatu ibinyabiziga byanyuranamo bitaha mu gihe abandi banyarukaga n’amaguru batanguranwa n’isaha ngo itabafatira mu nzira.

Ikibazo cyagaragaye ku munsi wa mbere ni uko hari bamwe mu baturage wasangaga batazi neza impinduka ku masaha yo gutaha byatumye bamwe babura imodoka zibacyura, abandi barazwa muri stade.

–  Polisi yategeye abo mu ntara imodoka zibacyura

Abaturage biganjemo abo mu Karere ka Musanze mu Majyaruguru y’u Rwanda no mu zindi ntara bageze muri Gare ya Nyabugogo basanga amatike ajya mu duce batuyemo yashize, bituma bamwe batangira gutekereza kuhaca ingando.

Dushimimana Eric yavuze ko bwamwiriyeho nyuma yo kujya gukatisha amatike agasanga yashize cyane ko iwabo I Musanze ho isaha yo kugera mu rugo yashyizwe saa Moya.

Ati “Byarangiye tugumye hano gutyo. Abayobozi bari kuduha icyizere ko tugiye gutaha. Twabyakiriye neza n’ibyishimo.’’

Nganyirente Espérance yageze muri Gare ya Nyabugogo saa Kumi, agiye gukatisha itike, asanga yarangiye.

Ati “Twabajije polisi itubwira ko twaharara [Nyabugogo]. Abayobozi badushakiye imodoka ngo dutahe dusubire iwacu. Turabyishimiye, kuko twibazaga uko tuzataha.’’

Yavuze ko yari avuye mu Karere ka Huye aho yari yagiye gusura umuntu wari urwaye, ataha atazi ko amasaha yo gutaha yahinduwe.

Mukanyirigira Christine utuye mu Murenge wa Byimana mu Karere ka Ruhango yavuze ko yari yagiye gusura abantu i Kibungo ahageze asanga abagenzi babaye benshi, imodoka zabuze.

Ati “Twebwe no kumenya amabwiriza, twabimenye tugeze i Gitarama, tuhageze nibwo abagenzi bamwe babakuye mu modoka kuko abari bemerewe kuyijyamo ari kimwe cya kabiri. Twaje ku ntebe hariho abantu babiri.’’

Bamwe mu babyeyi bari banafite abana babo nyuma yo kubura aho berekeza, ahagana saa Tanu z’ijoro zishyira saa Sita nibwo batangiye gufashwa na Polisi y’Igihugu gutaha.

Bahurije ku gushima inzego z’umutekano zabafashije gutaha nyuma yo kubagenera imodoka za RITCO zibageza aho batuye.

Mu bice bitandukanye by’igihugu, saa Tatu z’ijoro wasangaga abantu benshi bageze mu ngo zabo ariko hari abafashwe bajyanwa muri stade aho bibukijwe ingamba zo kwirinda Coronavirus, banacibwa amande mbere yo kurekurwa.

Umunyamakuru wa IGIHE ufata amafoto, Muhizi Serge, yazengurutse mu bice bitandukanye bya Kigali areba uko aya mabwiriza yubahirijwe n’uko abo mu ntara bagobotswe bagahabwa imodoka zibageza iwabo.

Indi nkuru wasoma: Amasaha y’ingendo yahinduwe, imihango y’ubukwe irahagarikwa: Ingamba nshya zo gukumira COVID-19

Amasaha ashyira saa Tatu buri wese yanyarukaga agana mu rugo rwe

Mu muhanda ugana i Remera uvuye mu bice bya Kigali Convention Centre, ibinyabiziga byari byinshi bitaha

Amasaha yo gutaha yashyizwe saa Tatu avuye saa Yine yari asanzweho

Ni ibisanzwe ko mbere y'uko amasaha yo gutaha agera, ibinyabiziga biba bicanamo ku bwinshi buri wese atanguranwa n'abandi gutaha

Polisi y'Igihugu yari maso ikurikirana uko amabwiriza mashya yashyizweho mu kwirinda Coronavirus yubahirizwa

Ahenshi nyuma ya saa Yine wasangaga abantu bashize mu mihanda

Ijoro rya Kigali rya nyuma ya saa Tatu ryari rituje kuko abantu benshi bari batashye

Kuva ku bagenda n'amaguru kugera ku batwaye ibinyabiziga, buri wese yahagarikwaga akabazwa ikimugenza, yaba impamvu yumvikana agakomeza urugendo bitaba ibyo agakanirwa urumukwiye

I Remera, imodoka zari mu mihanda zari nke cyane

Abagenzi bari benshi muri Gare ya Nyabugogo, biganjemo abaganaga mu ntara, bukabiriraho bakabura uko bataha

Ubusanzwe haba hari ibinyabiziga byinshi ariko mu ijoro wasangaga byagabanutse bifatika

Mbere yo guhabwa imodoka, abagenzi bashakaga uburyo bubafasha kwifubika ntibicwe n'imbeho y'ijoro

Abenshi mu bagenzi bageze muri Gare ya Nyabugogo basanga imodoka zashize kubera impinduka zabayeho mu masaha yo gutaha

Imodoka zitwara abagenzi za RITCO nizo zifashishijwe mu gucyura abagenzi bari babuze uko bava muri gare

Inyubako nyinshi zikorerwamo na Sosiyete zitwara abagenzi zari zafunzwe

Bamwenyuye nyuma yo guhabwa imodoka zibafasha gutaha mu ngo zabo. Abenshi bari bitwaje imizigo yabo byerekana ko bari mu rugendo

Ahagana saa Sita z'ijoro nibwo abaturage bari babuze uko bava muri Gare ya Nyabugogo batangiye gutaha

Bafashijwe gutaha nyuma y'amasaha menshi nta cyizere bafite ko babona uko bava muri gare, yari yamaze gufungwa

Uyu mubyeyi yavuze ko yageze muri gare agasanga amatike yashize ndetse ko atari azi ko ingendo zahinduriwe amasaha

Binjiye mu modoka hakurikijwe ingamba zo kwirinda icyorezo cya Coronavirus zirimo guhana intera no kwambara neza agapfukamunwa

Polisi y'Igihugu ni yo yafashije abaturage gutaha ndetse yagenzuraga ko buri kimwe cyose gikorwa mu buryo butunganye

Hari aababyeyi bari banafite abana bato, bibazaga uko baza kwitwara kuko bari batakaje icyizere cyo gutaha mbere y'uko bucya

Abari bafite imizigo bari bayirambitse hasi bategereza uko bigenda

Amafoto: Muhizi Serge