Vettero ni inzu y’imideli yashinzwe na Muhumure Bryan, Umunyarwanda wiga muri Algonquin College muri Canada mu bijyanye no gukora ibishushanyo by’inyubako.

Uyu musore usigaye ari Umunyamideli yatekereje kuba yatangira gukora imyenda mu 2017, ntiyahita abigeraho kuko atari afite ubushobozi bwo gutangira.

Mu mpeshyi ya 2021 nibwo yageze ku nzozi ze zo gutangira kwambika abantu, mu ntangiriro zigoye cyane yabashije kumvisha abantu ko bakwiye kumwishyura mbere kugira ngo abakorere aho byanze akaguza amafaranga.

Muhumure yabonye ko iyi mikorere itazaramba ahubwo yigira inama yo gushaka akazi yajya akora nyuma y’amasomo kamufasha gukora imideli yihebeye.

Nibwo yatangiye kujya atwara imodoka zitwara abarwayi barembye (Ambulance) akabikora amasaha y’ikirenga kugira ngo abone ubushobozi bwo gukora imyambaro itandukanye.

Mu kiganiro IGIHE yagiranye na Muhumure, yavuze ko kugira ngo abashe kubona amafaranga yatumye ashyira imyenda ye hanze mu buryo bwiza yakoraga amasaha menshi mu bihe by’ibiruhuko.

Ati “Natwaraga imodoka z’abarwayi ngakora iminsi myinshi ntabwo hano biba byemewe gukora amasha arenze 80 mu byumweru bibiri ariko nakoraga 120, nyuma naje kubona akazi ko gukora mu bitaro mfasha abaganga.”

Vettero kugeza ubu imaze gushyira hanze ubwoko bune bw’imyenda aribwo bwakunzwe n’ibyamamare byiganjemo abahanzi bari mu Rwanda n’abajya gutaramira muri Canada.

Ubwo Nel Ngabo yajyagayo mu bitaramo bye byose yambitswe n’iyi nzu y’imideli hamwe na Israel Mbonyi uriyo na The Ben.

Muhumure avuga ko iyo abonye ibyamamare byambaye imyenda yakoze bimushimisha kandi bikamuha imbaraga zo gukomeza gukora.

Ati “Sinzi uko nabivuga njye nabonye nandikira abahanzi nkabona baranyemereye bakajya mu birori bambaye imyenda yanjye biranshimisha kuko mba nabivunikiye.”

Muhumure ufite isoko ryiganje muri Canada, u Rwanda, u Bushinwa, Australia, u Buyapani, u Bwongereza n’ahandi yifuza ko ibikorwa bye byagera ku Isi hose imyambaro ye ikambarwa n’ingeri zitandukanye.

Vettero ikora imyambaro yo kujyana mu birori byubashywe n’isanzwe yo kwambara mu buzima bwa buri munsi. Kuri ubu bacururiza kuri murandasi ku rubuga rwabo rwa www.vettero.com n’imbuga nkoranyambaga zabo.

Imyambaro ya Vettero yakozwe na Muhumuza wihebeye imideli

Ingofero zakozwe n'iyi nzu y'imideli

Ishati yo muri Vettero ni imwe mu ikindwa n'ibyamamare

Israel Mbonyi mu gitaramo yagiriye muri Canada yari yambaye imyenda ya Vettero

Iyi myambaro uyikora byamusabye gutangira ashyizemo imbaraga nyinshi

Mu gitaramo cy'umuhanzi CK bose bari bambitswe na Vettero

Muhumure anezezwa no kubona ibyamamare byambaye imyenda ye

Nel Ngabo mu mwambaro wa Vettero ubwo yataramiraga muri Canada

Nel Ngabo mu bitaro yakoreye muri Canada yari yambitswe na Vettero

Umunyamakuru Lucky Nzeyimana mu bambara Vettero