Noland Arbaugh, yakoze impanuka y’imodoka mu 2016 afite imyaka 21, bituma ingingo zimwe na zimwe z’umubiri we zihagarara gukora.

Muri Mutarama uyu mwaka nibwo iyi sosiyete ya Musk, yamushyizemo akuma gakoresha ubwonko, kamushoboza kugenzura mudasobwa ye. Ni ubwa mbere igikorwa nk’icyo cyari kibaye.

Elon Musk, yatangaje ko kuba ingingo z’umuntu zidakora bitavuze ko adafite icyo yakora, ariyo mpamvu yatangije ibi bikorwa aho yari agamije ko umuntu yazajya ashyirwamo aka kuma maze akajya atekereza.

Ibyo ashatse ko bikorwa bikorwa ako kanya n’imashini-muntu (robot) cyangwa mudasobwa bitabaye ngombwa ko hakoreshwa amaboko cyangwa izindi ngingo ze.

Noland ati “Ku mbaga byagenze neza cyane, kandi byari byoroshye.”

Kuri uyu wa Gatatu, ikigo cya Neuralink Corp, cyagaragaje imbonankubone amashusho ya Noland, ari gukina imikino ku ikoranabuhanga ya Civilization VI na Chess ategekesha mudasobwa ubwonko bwe.

Noland w’imyaka 29 yagize ati “Nari narihebye nziko ntazongera gukina iyi mikino. Iri koranabuhanga ryamaze kumpindurira ubuzima.”

Mu butumwa yanyujije ku rukuta rwe kuri uyu wa Gatatu, Musk, yavuze ko hari igihe kizagera iri koranabuhanga rijye rigarurira abantu ubushobozi bwo kureba. Yagize ati “Gukuraho ubuhumyi ni cyo gikurikiyeho nyuma y’uko ubu umuntu ashobora kunyuza intekerezo ze muri mudasobwa.”

Yatangiye gukina imikino ku ikoranabuhanga abifashijwe n’akuma yashyizwemo kagenzura imikorere y’ubwonko