Kuva mu cyumweru gishize, umuhanzikazi Jody Phibi ari muri Uganda aho yagiye mu gikorwa cyo gufata amashusho no kunonosora umushinga w’indirimbo afitanye n’abahanzi bakomeye muri iki gihugu.

Nk’uko yabitangarije IGIHE , Jody uzwi mu ndirimbo nka Better Than Them, Ndacyashidikanya n’izindi, ngo kimwe mu bikorwa by’ingenzi ari gukorera muri Uganda harimo gusoza ifatwa ry’amashusho y’indirimbo ‘Kaleke Kasome’. Ayifatanyije n’abahanzi bo muri Uganda GNL Zamba, Ray Signature na Moris Hassa ,ari na we nyirayo.

Jody avuga ko aba bahanzi ari na bo bahagarariye umushinga Reach Ahand Uganda(RAHU mu magambo ahinnye). Ugamije gukora ubufasha n’ibikorwa by’urukundo ndetse kugeza ubu uyu muhanzikazi akaba yarabiyunzeho.

Mu ifatwa ry'amashusho y'iyi ndirimbo

Iyi ndirimbo Jody ahuriyemo n’aba bahanzi ni iy’uyu mushinga ndetse igamije kwigisha urubyiruko kwirinda kwishora mu ngeso mbi.

Yagize ati “Twe nk’abambasaderi tugomba kugira uruhare mu gukangurira urubyiruko kwirinda ingeso mbi n’ikintu cyose cyabangamira ejo harwo hazaza harimo ibiyobyabwenge ,abana b’abakobwa batwara inda bakiri mu mashuri ndetse n’abantu bakuru babashuka bakabashora mu ngeso mbi.”

Umushinga RAHU ushobora kuzagera mu Rwanda mu rwego rwo kwagura ibikorwa byawo ndetse ukaba ufite uwuhagarariye i Kigali.

Ati “Ufite uwuhagarariye mu Rwanda, ni ukuvuga ko hari gahunda yo kwagura ibikorwa uretse ko kugeze ubu bibanze cyane muri Uganda bazagenda bambuka imipaka gahoro gahoro.”

Jody aherutse gusinya muri Label yo muri Uganda yitwa Platinum Entertainment, iyobowe na Shadrack Kuteesa. Ifite uyihagarariye i Kigali witwa Salma Peter ari na we ufasha Jody ndetse bakaba bakorana nk’itsinda.

Hano ni mu gitaramo Jody aherutse gukorerana na Chameleone muri Serena Hotel

Uretse iyi ndirimbo Jody ari gukorera muri Uganda , ngo hari indi mishinga yitegura kugeza ku bafana be mu minsi ya vuba.