Imyaka irenga ibiri irashize icyorezo cya Covid-19 cyibasiye Isi ndetse gishegesha ibihugu byinshi haba ibikomeye n’ibyoroheje.

Mu gihe abandi bari mu bihe bigoye, Koreya ya Ruguru yo yagaragaje ko iki cyorezo kitabagezeho.

Ku wa 12 Gicurasi 2022 ni bwo Leta y’iki gihugu yatangije gahunda ya Guma mu rugo nyuma y’uko hari abantu bari bamaze kugaragaraho iki cyorezo cyari kimaze igihe cyihunza.

Ku wa Gatandatu, Ikigo cy’Itangazamakuru muri Koreya ya Ruguru, KCNA, cyatangaje ko imibare y’abarwayi imaze kugera kuri 3.448.880 muri bo 3.262.700 bamaze gukira naho 186.111 bakaba bari gukurikiranwa n’abaganga.

Abapfuye bo baheruka gutangazwa ku wa Gatanu, bari 69 bari ku kigero cya 0.002%.

Uku kugabanuka kw’imibare ni ko benshi badasobanukirwa bigaragaza ko harimo ibinyoma.

Igitekezo cya Dr. Kee B. Park cyashyizwe kuri CNN, yagaragaje ko Koreya ya Ruguru ikeneye ubufasha ngo ibashe guhashya Covid-19. Yavuze ko iki gihugu kidafite imiti ihagije yo kwita ku banduye.

Yakomeje avuga ko ikindi kibazo gihari ari icy’ubushobozi buhagije bwo gufata ibipimo byinshi bya Covid-19. Yanagaraje kandi ko bitewe na Guma mu rugo abaturage bafite inzara cyane abasanganywe amikoro make.

Ubwo iki cyorezo cyageraga muri iki gihugu hatangajwe imibare myinshi y’abacyanduye gusa hagenda hagaragazwa ko kiri kurwanywa byihuse, ingingo itaravuzweho rumwe na benshi bigaragaza ko hashobora kuba harabayeho guhisha ukuri.

Covid-19 isa n’imaze kugabanya umuvuduko mu bindi bihugu yari yaribasiye. Kugeza ubu ku Isi yose yanduwe n’abasaga miliyoni 500, ihitana abarenga miliyoni esheshatu.

Koreya ya Ruguru ivuga ko ingamba yashyizeho zibasha guhangana na Covid-19 mu gihe hari ababona ko iri kucyibasira