Uwapfuye ni umugore w’imyaka 93 wo mu Mujyi wa Kigali, naho abanduye iki cyorezo bo ni 77 biganjemo na none abatuye Umujyi wa Kigali.

Imibare ya RBC igaragaza ko abantu 1461 bamaze guhitanwa na Covid-19 kuva iki cyorezo cyagera mu Rwanda mu gihe abanduye bo barenga ibihumbi 130.

Ubwiyongere bw’ubwandu bwa Covid-19 muri iki gihe bukomeje gutuma abantu benshi bagira impungenge ku buryo hari n’abatangiye kwibwiriza kwambara udupfukamunwa mu gihe ubusanzwe byasaga n’aho tutagikoreshwa.

Minisiteri y’Ubuzima isobanura ko imibare ya Covid-19 igenzurwa harebewe ku mibare yerekana niba ikigero iriho mu gihugu ari icyo hasi cyangwa se igikabije.

Iyo ubwandu buri hasi y’abarwayi batanu ku baturage ibihumbi 100, biba bivuze ko nta mpungenge zihambaye icyorezo giteye. Umubare w’ubwandu uwushyize ku kigereranyo cy’abaturage bose muri rusange, usanga ko ari 1,6 ku bantu ibihumbi 100.

Ibyo bivuze ko ubwandu bukiri hasi ku buryo hari n’icyizere ko bitatuma ingamba zo kwirinda zivugururwa ku buryo zakazwa kurusha uko byari bimeze.

Ni no mu gihe kandi u Rwanda ruri mu bihugu byateye imbere mu gukingira umubare munini w’abaturage, aho hejuru ya 65% bageze imyaka yo gukingirwa babonye urukingo rushimangira.

Abenshi mu banduye Covid-19 muri iki gihe nta bimenyetso bikabije by’iyi ndwara bafite kuko umubare munini ari ababa barwaye ibicurane gusa.

Nta muntu uri mu bitaro urembejwe nayo bivuze ko n’urwaye ataremba, n’iyo arembye ntabwo azahara byo gupfa.

U Rwanda rufite amahirwe ko rwakingiye abaturage benshi, bituma ubudahangarwa bw'imibiri yabo buba hejuru ku buryo batazahara