00:00:00 IGIHE NETWORK KN KINYARWANDA EN ENGLISH FR FRANCAIS

Abafite ubumuga basabye ko serivise zose z’ubuvuzi bahabwa zashyirwa kuri mituweli

Yanditswe na Prudence Kwizera
Kuya 3 Ukuboza 2022 saa 09:56
Yasuwe :

Abafite ubumuga basabye Leta y’u Rwanda ko yaborohereza kuri serivisi z’ubuvuzi zose bahabwa bakajya bavurirwa kuri mituweli kuko kwiyishyurira 100% bibagora.

Babisabye kuri uyu wa Gatandatu tariki ya 3 Ukuboza 2022 ubwo mu kigo cyita ku bafite ubumuga cya HVP Gatagara mu Karere ka Nyanza hizihirizwaga umunsi mpuzamahanga w’abafite ubumuga.

Muri rusange abafite ubumuga bavuze ko bishimira ibyiza byinshi bamaze kugeraho birimo kuba mu gihugu cyita ku banyarwanda bose nta vangura, kwitabwaho byihariye, kwiga, kujya mu bikorwa by’iterambere no koroherezwa kuzamuka mu nyubako z’amagorofa ndetse n’ibindi.

Barakagendana Assoumpta ati “Twishimira ibintu byinshi twagezeho ariko mbere na mbere ni uko turi mu gihugu cyita ku banyarwanda bose nta vangura.”

Yakomeje avuga ko bagifite imbogamizi y’uko serivise z’ubuvuzi bakenera zibahenda kuko zose zitashyizwe ku bwisungane mu kwivuza bigatuma bamwe batazibona.

Yatanze urugero ku nyunganirangingo n’insimburangingo, avuga ko bagorwa no kuzibona biyishyuriye 100%.

Ati “Niba hari inyunganirangingo n’insimburangingo zihenze ariko zikaba zitari kuri mituweli urumva ko ari ikibazo. Twifuza yuko nanone Leta nk’uko yaduteye inkunga ikaba ikomeje no kudufasha, na mituweli yakwishingira n’ibyo byuma bihenze abantu bakabibona.”

Yakomeje avuga ko insimburangingo zashyizwe kuri mituweli zidakoze neza ku buryo iyo umuntu akuze ziturika.

Ati “Ni ukuvuga ngo iyo bayimushyizemo ntabwo ayimarana kabiri kuko uko agenda akura abyibuha kigera aho kigaturika ariko zazindi zihenze zikorerwa hanze zimara igihe umuntu akaba yazikoresha igihe kinini.”

Umuyobozi Mukuru wa HVP Gatagara, Frère Kizito Misago, yavuze ko batangiye gukorana na mituweli mu 2018 ariko kugeza ubu hari serivise zimwe na zimwe itishyura zirimo insimburangingo.

Yavuze ko bakoranye n’Ikigo cy’Ubwiteganyirize mu Rwanda, RSSB ariko binyura mu nzira igoye kugira ngo ufite ubumuga abone insimburangingo.

Ati “Insimburangingo ntabwo mu by’ukuri zirajya kuri mituweli ariko mu masezerano dufitanye na RSSB niba hari umuntu uje atugana bigaragara ko iyo nsimburangingo ayikeneye dusaba uburenganzira tukamuha fagitire hanyuma agahura n’umuganga wabo akareba niba iyo nsimburangingo ikenewe.”

Yakomeje ati “Urumva ko umurwayi bimugoye ariko twebwe iyo bamwemereye araza tukayimukorera ariko urumva ko aba yabanje kujya i Kigali kandi ntibahita bamusubiza uwo munsi, bizamusaba gutegereza.”

Kubwe asanga kugira ngo icyo kibazo gikemuke ari uko insimburangingo zashyirwa kuri mituweli kuko abazikenera benshi nta bushobozi baba bafite.”

Umuhuzabikorwa w’Inama y’Igihugu y’Abafite Ubumuga mu Karere ka Nyanza, Nyandwi Fulgence, yavuze ko kuba mituweli itabishyurira insimburangingo bibahangayikishije.

Ati “Ni ikibazo kiduhangayikishije kuko ni ikibazo kigikorerwa ubuvugizi kuko buriya ubuvuzi bw’abantu bafite ubumuga burahenda kandi ni ubuvuzi buhoraho kuko ntiwavuga ngo uramuvura akire kuko niba aguze insimburangingo uko akura bisaba ko nayo ihinduka.”

Umuyobozi w’Akarere ka Nyanza Wungirije Ushinzwe Imibereho Myiza y’Abaturage, Kayitesi Nadine, yavuze ko bazakomeza gufasha abafite ubumuga bita ku bibazo bafite kugira ngo bagire iterambere n’imibereho myiza.

Ku kijyanye n’insimburangingo, yavuze ko bazakomeza kubakorera ubuvugizi kugira ngo zishyirwe kuri mituweli.

Yagize ati “N’ubundi turacyakomeza kuvugana na RSSB kugira ngo izo serivise zose zishingirwe kuko nazo ni iz’ubuzima. Ubuvugizi turabukomeza kandi twizeye ko nabyo bazabyemera.”

Umunsi mpuzamahanga w’abafite ubumuga wizihijwe ku Isi yose ku nshuro ya 30 ariko mu Rwanda wizihijwe ku nshuro ya 21. Ufite insanganyamatsiko igira iti “Duhange udushya tugamije iterambere ridaheza”.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .