00:00:00 IGIHE NETWORK KN KINYARWANDA EN ENGLISH FR FRANCAIS

L&M Store yatangiye gukora amasakoshi y’abagore mu bitenge

Yanditswe na Mukahirwa Diane
Kuya 16 August 2022 saa 12:10
Yasuwe :

Inzu y’imideli ya L&M Store igamije gukundisha abakiri bato imyenda ikozwe mu bitenge, yashyize hanze ubwoko bune bw’amashakoshi y’abagore bukozwe mu bitenge.

Ubusanzwe mu Rwanda ntabwo bimenyerewe ko hakorwa amasakoshi yo gusohokana akozwe mu bitenge, ahubwo hasanzwe ibikapu byo gutwaramo ibintu bikozwe muri ibi bitambaro.

Ibi nibyo byatumye L&M Store ihitamo gukora aya masakoshi kugira ngo abakunda ibitenge bajye babona n’amasakoshi yabyo bashobora guserukana mu birori cyangwa ahandi bubashye.

Ubu bwoko bune bwahawe amazina atandukanye arimo Jaber Handbag, Atis Handbag, Agulu Handbag, Osiepa Handbag. Yose yakorewe muri iyi nzu kuva ku ntangiriro.

Hari abashakaga kugira isakoshi y’igitenge bagafata iyo basanganywe yakorewe ahandi bakacyomekaho gusa muri iyi nzu bo bikoreye ayabo bifashishije impu zabugenewe bakuye muri Tanzania.

Mu kiganiro na IGIHE, Umuyobozi wa L&M Store, Mugisha Louange, yavuze ko yagize igitekerezo cyo gukora aya masakoshi nyuma yo kubona ko hari abayashaka bakayabura.

Ati “Nabonye mu Rwanda tugira bya bikapu byo mu gitenge biba ari binini byo gutwaramo ibintu ariko nari ntarabona amasakoshi yo kugendana mu ntoki akozwe muri ubu buryo.”

Yakomeje avuga ko byabafashe igihe kinini kuyakora kuko ibikoresho byasabaga kubitumiza hanze y’u Rwanda.

L&M Store yatangiye gukora mu 2020. Yabanje gusohora imyambaro irimo Ineza Collection na Iriza Collection.

Iyi nzu ikorera ubucuruzi Kimironko mu Mujyi wa Kigali ndetse ibindi bihangano byayo ibinyuza ku mbuga nkoranyambaga zayo zirimo na Instagram.

Osiepa Handbag, kimwe mu masakoshi yakozwe mu bitenge na L&M Store
Icyatumye iyi nzu y'imideli ikora aya masakoshi ni uko yabonaga hari icyuho
Iyi nzu y'imideli ifite intego yo guteza imbere ibikozwe mu bitenge
Aya masakoshi ushobora kuyaserukana mu birori cyangwa ahandi ushaka kurimba muri ubu buryo
Aya masakoshi akozwe mu buryo butandukanye n'amabara atandukanye, uyikunze ahitamo iyo yifuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .