00:00:00 IGIHE NETWORK KN KINYARWANDA EN ENGLISH FR FRANCAIS

Apple yiyegereje kabuhariwe muri Lamborghini; gahunda ni ugukora imodoka yitwara y’amashanyarazi

Yanditswe na Umwali Zhuri
Kuya 28 July 2022 saa 09:27
Yasuwe :

Mu 2014 Apple yatangiye umushinga yise “Titan”, igamije guhuriza hamwe abahanga mu bijyanye no gukora imodoka bagera ku 1000 kugira ngo bakore ikoresha amashanyarazi ishobora kwitwara. Aho yabahurije ni ahantu hagizwe ibanga hafi y’icyicaro cy’iyi sosiyete mu gace ka Cupertino i California.

Uyu mushinga wa Apple wo gukora imodoka utangira wahuye n’inzitizi nyinshi kuko hari impinduka zakorwaga umunsi ku wundi mu buyobozi bw’iyi sosiyete. Byavugwaga ko imodoka ya mbere ishobora kujya hanze mu 2020 ariko ntabwo byakunze.

Ubu uyu mushinga wongeye kugaruka. Bivugwa ko gahunda ari ugukora imodoka y’amashanyarazi ariko ishobora kwitwara, ikaba yaba ifite ikoranabuhanga rikataje kurusha izindi zose ziriho muri iki gihe.

Hari n’amakuru yavugaga ko ari imodoka izaba itagira amapine, abandi bakavuga ko izaba itagira ahantu umushoferi akandagira yongera umuvuduko cyangwa se afata feri.

Igishya muri uyu mushinga ni uko ubu Apple yerekeje amaso kuri kabuhariwe mu gukora imodoka wakoranye igihe kinini n’uruganda rwa Lamborghini.

Ni umugabo w’Umutaliyani witwa Luigi Taraborrelli, umaze imyaka 20 akorana na Lamborghini. Apple irashaka ko ayifasha guhanga imodoka y’akataraboneka ikoreshwa n’amashanyarazi

Taraborrelli ni we wari umuyobozi w’ishami rishinzwe kugenzura imiterere y’imodoka za Lamborghini [ibizwi nka chassis] ndetse akaba yari ashinzwe kugenzura uburyo izi modoka zikora.

Taraborrelli abaye umwe mu bahanga mu bijyanye no gukora imodoka wiyunze kuri Apple.

Ni umugabo wakoze ku modoka z’iyi sosiyete zitandukanye zirimo nka Lamborghini Urus, Huracan na Aventador.

Yari ashinzwe kugenzura ko imodoka za Lamborghini zidahura n’ibibazo bya feri, iby’uburyo amapine yikaraga n’ibindi bitandukanye.

Mu ntangiriro z’uyu mwaka, Apple yari yahaye akazi undi muhanga mu gukora imodoka wamaze imyaka 31 akorana na Ford Motor Co. kugira ngo akurire ishami ryayo rishinzwe umutekano w’imodoka.

Umwaka ushize nabwo yahaye akazi Ulrich Kranz, wahoze akuriye Sosiyete y’imodoka yitwa Canoo Inc ndetse yanayoboye ishami rishinzwe imodoka zikoresha amashanyarazi rya BMW.

Hari n’undi muntu Apple yahaye akazi mbere y’aba bose. Ni uwahoze ari Umuyobozi w’ishami rishinzwe imodoka zitwara za Tesla, Stuart Bowers.

Apple isanzwe imenyerewe mu gukora ibikoresho by'ikoranabuhanga birimo telefoni na mudasobwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .