00:00:00 IGIHE NETWORK KN KINYARWANDA EN ENGLISH FR FRANCAIS

Zabyaye amahari muri Kiyovu Sports: Perezida na visi perezida basubiranyemo

Yanditswe na Ntare Julius
Kuya 1 Ukuboza 2022 saa 01:27
Yasuwe :

Burya ngo ahacumba umwotsi haba hari n’umuriro! Uwo muri Kiyovu Sports watangiye gutunguka mu kirere ku wa 27 Ugushyingo 2022, umunsi iyi kipe yatsinzwemo na Gasogi United ibitego 3-1.

Ni umunsi washaririye Abayovu kuva ku bo hasi bamwe bisiga amarangi kugera mu bushorishori bwayo, ku ntebe yicaweho na Mvukiyehe Juvénal.

Uyu mugabo umukino ukirangira yahise abwira itangazamakuru ko atishimiye uburyo umutoza we Alain-André Landeut yitwaye ndetse ko agomba kumuhagarika, akanahabwa ibihano, ariko yaje kwisubiraho avuga ko yabikoreshejwe n’umujinya.

Uburakari bwo gutsindwa na Gasogi United bwanageze kuri Visi Perezida wa Kiyovu Sports, Ndorimana Jean François Régis uzwi nka "General". Na we ntiyariye indimi mu kwerekana ko atanyuzwe n’uko ikipe ye yitwaye.

Yavuze ko bitumvikana uburyo ikipe nka Kiyovu Sports itsindwa na Gasogi United mu buryo benshi bashidikanyijeho, ndetse bamwe bagatunga agatoki amanyanga ashobora kuba yarabaye, bakabihuza no kuba umukino waragurishijwe.

Mbere y’umukino ku wa Mbere, tariki ya 26 Ugushyingo 2022, Komite ya Kiyovu Sports yaganiriye n’Umutoza Alain-André Landeut nyuma y’imyitozo ya nyuma, baganira ku bikwiye kunozwa.

Bumvikanye ko mu bakinnyi bazifashishwa, mu izamu habanzwamo Nzeyurwanda Djihad wari umaze icyumweru yitoza kandi aheruka kwitwara neza mu mikino.

Abagize komite bifuzaga ko na rutahizamu Elisa Ssekisambu ukomoka muri Uganda yabanza mu kibuga agafatanya na Mugenzi Bienvenue ufatwa nka "Chouchou w’Abayovu", kuko bizeraga ko bazabahesha intsinzi kuri Gasogi United.

Aganira na IGIHE, Ndorimana yavuze ko komite yatunguwe no kubona impinduka umutoza yakoze habura iminota mike ngo umukino utangire, zitandukanye n’ibyo bari bumvikanye ku myitozo.

Icyo gihe byamwanze mu nda ahitamo guhamagara Perezida we Mvukiyehe, ntiyitaba telefoni ngendanwa. Yaje kwinjira muri Stade ya Kigali igitego cya mbere cya Gasogi United cyinjiye.

Yagize ati "Mbere y’umukino namuhamagaye inshuro icyenda kuri telefoni ngendanwa atayitaba nshaka kumubaza uburyo umutoza abanza mu izamu Kimenyi Yves utarakoze imyitozo ya nyuma, agasiga Nzeyurwanda Djihad wakoze imyitozo icyumweru cyose kandi amaze iminsi yitwara neza, gusa nta gisubizo nabonye.’"

"Inama yakozwe ku wa Mbere kuri Stade ya Kigali dukurikiye imyitozo. Nyuma y’imyitozo Perezida yavuganye n’abakinnyi n’umutoza, Landeut yemeza ko umwuka umeze neza mu ikipe nta kibazo. Icyo gihe Kimenyi ntiyari mu myitozo ya nyuma ari na yo mpamvu nk’ubuyobozi twafashe icyemezo cy’uko yabanza ku ntebe y’abasimbura.’"

Yongeyeho ko bumvikanye ko na Rutahizamu Elisa Ssekisambu agomba kubanza mu kibuga, agatahana izamu na Mugenzi Bienvenue.

Ati "Twumvaga ko ubu busatirizi buri buhe akazi gakomeye Gasogi United. Twabiganirije n’umutoza arabyemera, ariko si ko byagenze ahubwo Ssekisambu twatunguwe no kumubona ku ntebe y’abasimbura. Kuva icyo gihe umutoza ntaratubwira impamvu yakoze izi mpinduka kuko avugana na Perezida gusa, ni we aha raporo.’"

Ndorimana utishimiye uko ikipe iyobowe, atangaza ko Perezida Mvukiyehe afata imyanzuro nta muntu agishije inama.

Yagize ati "Juvénal yaje asanga ikipe itari ahantu heza, ayishyira no ku rwego rushimishije ariko ibyo ari gukora ari kwivangira. Nta muntu wifuza kumubyiga muri Kiyovu, nta n’utifuza ko yayiyobora kuko ayiyoboye neza, ariko na none hari imitima y’abantu ibabaye kubera imyitwarire ye. Uyu munsi ati ’nagiye, ndegura, nagarutse, murampa imigabane 51%."

Yamusabye gushikama, agahitamo kuyobora ikipe cyangwa akayireka akagenda, igahabwa abandi.

Ati "Uyu munsi wumva avuze ngo ibi bintu ndabirambiwe, Kiyovu Sports ndashaka kuyivamo, ejo ukumva yagarutse. Nahitemo kimwe niba yifuza kuguma mu ikipe nayigumemo atuze tuyiyoborere hamwe nka komite cyangwa agende ayisigire abashaka kuyiyobora.’"

Ndorimana nka Visi Perezida w’Ikipe yo ku Mumena, yatangaje ko Kiyovu Sports itabura uko ibaho.

Yunzemo ati "Kiyovu imaze igihe kinini iriho, kuba yaraje akayishyira mu bihe byiza ntabwo ari ibintu bidasanzwe. Igikombe twaragitwaye cya Made in Rwanda ariko twigeze gutwara n’ikindi cy’inzitiramubu, ariko nta Shampiyona turabona, nta Gikombe cy’Amahoro turatwara.’"

Ndorimana yemera ko ikipe ikina neza, ifite abakinnyi beza ariko itakaza imikino mu buryo budakwiye.

Kuri we asobanura ko ibi ari na byo byamuteye kuvugana uburakari nyuma y’umukino wa Gasogi United.

Ati "Twese twari dutangiye kumushyigikira ngo dutware Igikombe cya Shampiyona, njye nta kindi cyanzanye muri Kiyovu Sports nagiraga ngo ndebe ko twagitwara; naje nje gushyigikira umuntu nabonaga ari mu murongo mwiza tukagitwarana, ariko ntungurwa no kubona aho mbigereyemo. Ibyo nabonye si byo nabonaga mbere ndi hanze yayo, ariko bikomeje nk’uko bimeze Kiyovu gutwara igikombe cya shampiyona byaba ari inzozi."

Mvukiyehe uheruka gutangaza ko azegura ku buyobozi bwa Kiyovu Sports mbere y’uko umwaka urangira, yashimangiye ko yaba akiri mu ikipe cyangwa yaravuyemo, izegukana igikombe cya shampiyona.

Kuri Ndorimana we avuga ko bigoye kuko nta mucyo uri mu ikipe ku buryo byatuma igera ku ntego zayo.

Ati "Ibintu byose ntiwabikora uri wenyine ngo ubishobore, yahagaritse umutoza w’ikipe atatubwiye anamugarura atatumenyesheje. Ibintu byose bimuri ku mutwe, nta muntu abaza, nta we agisha inama."

"Mu by’ukuri akora ibyo ashaka byose, ni yo mpamvu yageze ku rwego rwo kumva ko Kiyovu yaba iye kuko abona abikora abantu bakamwihorera ariko ntabwo byashoboka, ntabwo byamukundira.’"

  Icyatumye Ndorimana yijundika Perezida we Mvukiyehe

Nyuma y’umukino wa Gasogi United, Ndorimana yumvikanye avuga ko atemeye uko ikipe ye yapanzwe asa n’ushaka gutunga agatoki Perezida Mvukiyehe Juvénal.

Yavuze ko Mvukiyehe ari we warambagije umutoza kandi bakorana umunsi ku wundi.

Ati "Sinamutunze urutoki 100% ariko ni we numvaga ko abifitemo uruhare kuko twapanze ibintu njye na we nka Visi Perezida we na Komite turi kuri Stade, ntibyakurikizwa."

"Mbere y’uko ikipe ijya mu kibuga naramuhamagaye kandi nahamagarwaga n’umutoza wungirije na Team Manager bambaza bati ’ibintu twapanze ejo ko umutoza abihinduye?’’ Umutoza ni we wamuzanye nta wundi ngomba kubibaza ni Perezida."

Icyakora, Ndorimana yisubiyeho ku magambo yatangaje nyuma yo gutsindwa na Gasogi United, ashimangira ko hari ibyo atashiraga amakenga byasanishijwe no kuba umukino wagurishijwe [match fixing].

Icyo gihe yari yagize ati "Abantu barakubwira ngo Bruxelles bakize. Sinzi ikindi kibyihishe inyuma. Njye ni bwo nkiza mu buyobozi bwa Kiyovu Sports ariko ni ibyavugwaga mbere y’uko nza ariko sinakwemera kuba muri uyu mwanda biramutse bihari koko."

"Ntabwo turi insina ngufi kuri Gasogi. Hari ibintu byinshi bibera mu mupira wacu. Ntabwo Kiyovu ari ikipe yo gutsindwa na Gasogi. Ndi muri bamwe bemeza ko ari match-fixing. Hari byinshi twaganiriye mu nama mbere y’uyu mukino ariko nta na kimwe cyakurikijwe.”

Aganira na IGIHE, Ndorimana yasobanuye ko atatunze agatoki Mvukiyehe ko yagurishije umukino, ahubwo yari afite uburakari.

Ati "Sinigeze mutunga urutoki ngo mvuge ko kugurisha umukino ari byo 100%, nari mfite umujinya kandi mvuga ko nemeranywa na bamwe mu bafana bemeza ko uyu mukino wari wagurishijwe. Nubwo ibyo nabivuze ariko byavugiwe mu bafana ba-betinze i Burayi n’abandi bari bazi uko umukino uri burangire.’’

"Hari n’uruhande ureba ukabona ko abafana kubivuga bafite impamvu, ikipe [Gasogi United] imaze imyaka itatu itsinda indi [Kiyovu Sports], nta kipe itaratsinda mu myaka itatu ishize. Iza gutsingwa na Gasogi gute se? Ntibishoboka."

Kiyovu Sports ni iya kabiri ku rutonde rwa shampiyona n’amanota 21, izasubira mu kibuga ihura na AS Kigali ya gatatu n’amanota 20, tariki 3 Ukuboza 2022, kuri Stade ya Kigali i Nyamirambo.

Visi Perezida wa Kiyovu Sports, Ndorimana Jean François Régis uzwi nka “General”, yakemanze uburyo ikipe ye yitwaye ku mukino yatsinzwemo na Gasogi United
Perezida wa Kiyovu Sports, Mvukiyehe Juvénal yijunditswe ko ayobora ikipe uko abishaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .