00:00:00 IGIHE NETWORK KN KINYARWANDA EN ENGLISH FR FRANCAIS

Imbere mu rusengero rw’Abahindu i Kigali ku gicumbi cy’imana 16 (Amafoto)

Yanditswe na Akayezu Jean de Dieu
Kuya 6 Ugushyingo 2022 saa 04:34
Yasuwe :

Mu gihe abandi bizihizaga isabato kuri uyu wa Gatandatu, ku Musozi wa Rebero mu Mujyi wa Kigali, Abahinde baba mu Rwanda bo bari bakoraniye mu birori byo kwizihiza Umunsi Mukuru wa Maha Vivah.

Ni ho haherereye Urusengero rw’Idini ry’Aba-Hindu [Hindu Mandal Of Rwanda Temple], icyicaro cya mbere iri dini rikomoka mu Buhide ryagize muri iki gihugu kuva mu myaka 100 ishize.

Wari umunsi ukomeye mu mateka y’imyemerere y’Abahindu, aho baba bizihiza urukundo rwa Sri Krishna washyingiranywe na Mata Tulsiji, zimwe mu mana zisengwa n’abayoboke b’iri dini.

Muri ibi birori, umugore n’umugabo bagira uburyo bwihariye bahabwamo umugisha. Baba bitwaje imbuto zirimo amatunda, pomme, ibinyomoro n’indabo byo gutura izo mana, bakazizimanira.

Mbere yo kwinjira muri uru rusengero, usabwa gukuramo inkweto. Ni ihame ntakuka.

Imbere muri ‘Temple’ wakirwa n’imitako ishashagirana n’ibishushanyo biri ku nkuta bifite ibisobanuro bitandukanye, n’imana 16.

Buri mana iba ifite imbaraga cyangwa ubushobozi bwayo, ku buryo Umuhindu ayiyambaza bitewe n’icyo ishobora kumufasha cyangwa kumusubiza.

Hari nk’imana wiyambaza ufite uburwayi ugakira, abafite ikibazo cy’imyuka mibi nabo bakagira iyo biyambaza, igahunga.

Izo mana zirimo Hanumanji, Swamy Iyyappa, Valli-Subramanya - Devanai, Dakshinamurthy, Shivsankara & Parivar, Shree Radhey Krishna, Saraswathy, Mataji, Mahalakshmi, Shree Sitaram, Shree Prrasanna Venkateshwara, Shree Sairam, Swamy Narayan,Jalaram Baba, Jai Ambe ndetse na Ganeshji.

Iyo basenga, umuntu ahagarara imbere y’iyo mana ukabona aganira na yo mu mutima we, yarangiza agakora ikimenyetso. Yikora ku gahanga no ku mutima, hakaba n’abikora ahandi.

Abahindu kandi bagira uwo twagereranya na ‘Padiri’, mu Gihinde bita ‘Pujari cyangwa Archaka’. Kumenya izina rye biba bigoye cyane, ariko twaje kimenya ko yitwa Deepak Shukla.

Hari n’abandi baba ari abayobozi bakomeye mu idini nk’uwaritangije mu Rwanda, Rajni Patel, mu gihe Umuyobozi w’Abahinde baba mu Rwanda, Prakesh, na we ari umwe mu baba bavuga rikumvikana.

Abahinde ba mbere bageze mu Rwanda mu myaka 100 ishize, bahise batangira kugeza ku buyobozi bw’igihugu ubusabe bwo kubaka ‘Hindu Temple’.

Mu 2017, nibwo babonye ibyangombwa bibemerera kubaka urusengero, ndetse Guverinoma ibaha ubutaka ku buryo bahise batangira imirimo, irangira mu 2019. Ni nabwo uru rusengero rwatashywe ku mugaragaro.

Nyuma y’iyi myaka yose, ku mugoroba wo kuri uyu wa 5 Ugushyingo, muri uru rusengero habereye ibirori byo gushimira Abahinde bakomeje kubungabunga umuco w’igihugu cyabo, harimo no guharanira ko urusengero rw’Aba-Hindu rwubakwa mu Rwanda.

Paul Birungi Masterjerb, Umunyamuryango wa Rotary Club wigeze kungiriza Guverineri wa Rotary mu Karere ka 9150 mu Rwanda mu mwaka wa 2017-2018, ni umwe mu bitabiriye uyu muhango.

Bahawe ibihembo bya ‘World Book of Record’, bihabwa umuntu wakoze ibidasanzwe.

By’umwihariko, aba Bahinde bahembewe ko uretse gusigasira umuco wabo, bagaragaye mu bikorwa byo guhuza Abahinde bagenzi babo baba mu Rwanda.

Urvashi Joshi wahawe iki gihembo, ni uwo mu gisekuru cya gatandatu kuko umuryango akomokaho wageze mu Rwanda mu 1921. Babanje kuba i Gisenyi, nyuma umuryango ugenda wagukira hirya no hino mu gihugu.

Yahembwe nk’uwateje imbere umuco w’u Buhinde, arawusigasira ndetse agerageza gushyira hamwe abahinde bo mu Rwanda, bashyiraho urubuga bahuriyemo ndetse bubaka ‘Hindu Temple’.

Yabwiye IGIHE ati “Turashimira Guverinoma y’u Rwanda yaduhaye aho kuba, igihugu cyadufashe neza kandi banaduhaye ubutaka bwo kubakaho uru rusengero rwiza, kugira ngo tujye tubona aho duhurira, dusigasire umuco wacu nk’Abahinde.”

“Dushaka kwigisha umuco wacu abazadukomokaho nk’abantu turi ku butaka bw’amahanga. Ibigize umuco wacu rero tuzajya tubyigishiriza muri uru rusengero kandi bizatuma abana bacu n’abazabakomokaho bakurana umuco wacu.”

Kugeza ubu Abahinde baba mu Rwanda babarirwa hagati ya 4000 na 5000. Biganje mu bikorwa by’ubucuruzi bw’amaduka, ikoranabuhanga n’ibindi.

Ibyo wamenya ku Idini ry’Abahindu

Ni idini ryabayeho kuva hambere, ndetse imigenzo yaryo ijyana n’umuco gakondo w’u Buhinde.Rigendera ku nkingi eshatu arizo ukuri, ubumuntu n’urukundo. Kuri ubu ribarirwa mu bayoboke miliyari 1, 35, ni ukuvuga abari hagati ya 15–16% by’abatuye Isi.

Abahanga mu by’amateka bamwe bavuga ko idini ry’Abahindu ryatangiye mu myaka isaga 3.500 ishize, igihe abantu bari bafite uruhu rwera bimukaga ari benshi baturutse mu majyaruguru y’uburengerazuba bw’ikibaya cya Indus, ubu igice kinini kiri muri Pakisitan no mu Buhinde.

Mu idini ry’Abahindu kimwe no mu yandi madini, harimo inyigisho z’ibanze zigenga imitekerereze n’imyifatire yabo ya buri munsi.

Ikomeye muri zo ni iya ahimsa, bivuga kutagira urugomo, ari na yo yatumye Mohandas Karamchand Gandhi (1869-1948) wamenyekanya nka Mahatma Gandhi amenyekana cyane, ubwo yatangizaga impinduramatwara yo gusaba ubwigenge nta mbaraga zikoreshejwe.

Indi nyigisho igenga Abahindu n’imyifatire yabo, ikaba ingenzi cyane muri iri dini, ni Karma. Iryo ni ihame rivuga ko buri gikorwa cyose kigira ingaruka mbi cyangwa nziza.

Abahindu bemera ko "Umuntu ari we ugena ibimubaho mu buzima, kandi n’igihe akiri urusoro agerwaho n’ingaruka z’ibikorwa yakoze mbere akiri mu bundi buzima."

Amafoto: Rwema Bugingo Derrick


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .