Iki gitaramo yise ‘Unconditional Love’, cyabaye mu ijoro ryo ku Cyumweru, tariki 30 Ukwakira 2022, ahazwi nka Camp Kigali. Cyaranzwe n’ubwitabire bwo hejuru ndetse abacyitabiriye bafashijwe kwegerana n’Imana binyuze mu ndirimbo zo kuyiramya no kuyihimbaza.

Bosco Nshuti yafashijwe n’abandi bahanzi barimo Alarm Ministries, Alex Dusabe, James & Daniella, Joshua Ishimwe [Josh] ndetse na Deejay Spin wabafashije mu kuvanga imiziki.

Uyu muramyi akunzwe mu ndirimbo zitandukanye zirimo "Ibyo Ntunze", "Umutima", "Utuma nishima", "Ngoswe n’ingabo", "Uranyumva", "Ntacyantandukanya", "Nzamuzura", "Ni wowe", "Dushimire", "Isaha y’Imana", "Ni muri Yesu" n’izindi nyinshi.

Yavuze ko impamvu igitaramo cye yacyise ’Unconditional Love’ ari ukubera ko "Imana yadukunze tukiri abanyabyaha, nta kiguzi twatanze ngo Imana idukunde ahubwo yo yadukunze tukiri babi kuko ari Imana ubwayo ni urukundo".

Muri iki gitaramo, abitabiriye bagaburiwe Ijambo ry’Imana n’Umushumba mu Itorero rya ADEPR, Pasiteri Habyarimana Desiré, wagarutse ku rukundo Imana yakunze abari mu Isi kugeza ubwo itanze umwana wayo w’ikinege kugira ngo abacungure.

Bosco Nshuti yerekanye umukunzi mu gitaramo

Bosco Nshuti yataramiye abakunzi nyuma y’igihe yerekanye mu rusengero umukunzi we witwa, Vanessa Tumushime.

Yamwerekanye mu rusengero rwa ADEPR Mbugangari i Rubavu mu gutangiza umushinga w’ubukwe bwabo.

Aba bombi bamaranye imyaka irenga itatu bakundana. Berekanwe mu rusengero tariki 14 Kanama 2022.

Ubwo yari ageze ku rubyiniro mu gitaramo cyo kuri iki Cyumweru, Nshuti Bosco yasabye umukunzi we, Tumushime Vanessa kuzamuka agasuhuza abacyitabiriye.

Aha ni ho yahise aboneraho umwanya wo kumwereka abaje kumushyigikira muri iki gitaramo, abasaba kuzakomereza kubashyigikira mu rugendo rushya barimo rwo kubana nk’umugore n’umugabo.

Ubukwe bw’aba bombi buteganyijwe mu Ugushyingo 2022.

Muri iki gitaramo, Bosco Nshuti yasabye abamushyigikiye gufata umunota wo kunamira umuhanzikazi Gisèle Precious uherutse kwitaba Imana.

Ati "Twabuze umuhanzi wacu, yari inshuti yacu kandi yaraduhemburaga. Ndagira ngo mureke dufate umunota wo kumwibuka."

Bosco Nshuti ni umuhanzi uririmba ku giti cye, akanabarizwa mu makorali amaze kuba ubukombe ari yo Silowamu ya ADEPR Kumukenke na New Melody.

Ni umuhanzi w’umuhanga mu myandikire n’imiririmbire, watangiye kuririmba kera akiri muto, ahera mu makorali ariko by’umwihariko akaba yaratangiye kuririmba ku giti cye mu 2015.

Bosco Nshuti asanganira umukunzi we Vanessa Tumushime

Yahise amujyana kuri bosebabireba aho abitabiriye igitaramo bashoboraga kumwitegera neza

Yasabye imbaga y'abitabiriye igitaramo cye kubashyigikira mu rugendo batangije rwo kubaka umuryango

Bosco Nshuti yanyuze abitabiriye igitaramo cye yise "Unconditional Love''

Abitabiriye iki gitaramo batashye bahembutse bihagije

Umuramyi Nshuti Bosco uri mu bakunzwe cyane muri ADEPR afite igihembo giheruka mu bitangwa na Groove Awards Rwanda, yegukanye icy'umuhanzi w'umwaka mu 2018

Ihema rya Camp Kigali ryarimo abantu benshi

Bosco Nshuti akunzwe mu ndirimbo zitandukanye zirimo "Ibyo Ntunze" na "Umutima"

Bosco Nshuti yanyuze abitabiriye igitaramo cye yakoreye mu Mujyi wa Kigali

Abaririmbyi b'amajwi meza bari baherekeje Bosco Nshuti

Banyuzwe babyinira Imana

Bafashijwe baramburira Imana amaboko

Umuhanzi Nkomezi Prosper yari yaserutse ngo ashyigikire mugenzi we

Umuhanzi Irimbere Christian usengera muri Evangelical Restoration Church na we yitabiriye iki gitaramo

Ishimwe Joshua na we ari mu bahanzi baririmbye muri iki gitaramo

Umukinnyi wa Filime, Bamenya ari mu bitabiriye igitaramo

Pasiteri Octave Rukundo wa ADEPR Remera azamura isengesho

Pasiteri Habyarimana Desiré yigishije ijambo ry'Imana, ryagarutse ku rukundo Imana yakunze abari mu Isi kugeza ubwo itanze umwana wayo w’ikinege ngo abacungure

Dusabe Alexis yishimiwe n'abitabiriye iki gitaramo

Dusabe Alexis ni umwe mu bahanzi bafite izina rifatika mu muziki uhimbaza Imana

Umuhanzi Mani Martin na we yitabiriye iki gitaramo

Yafashijwe aramburira Imana amaboko nk'ikimenyetso cyo kunyurwa byuzuye

James na Daniella baririmba indirimbo zo kuramya no guhimbaza Imana banyuze benshi mu ndirimbo zabo zikunzwe

Daniella afite ijwi ryiza rinyura amatwi y'abamwumva

James aririmba anicurangira gitari

Amafoto: Munyakuri Prince