Mu ndirimbo ye nshya “Umukwabo” ari kumwe na Bruce Melody, umuraperi Major X, araririmba yibanda ku gucyaha no kwibasira urubyiruko rwugarijwe no kunywa ibiyobyabwenge, agasaba ko inzego zishinzwe umutekano kurushaho gukaza umukwabo wo gufata uru rubyiruko.

Iyi ndirimbo Major X, ubarizwa mu itsinda rya Flat Papers, ayishyize hanze mu gihe mu Rwanda no hirya no hino ku isi hizihizwaga icyumweru cyahariwe kurwanya ibiyobyabwenge mu rubyiruko.

Mu Rwanda hari hashize iminsi hakorwa imikwabo nk’iyi aririmba mu nce za Nyamirambo ahakunze kurangwa abasore n’inkumi bakunze gukoresha ibiyobyabwenge.

Aganira na IGIHE, Major-X yavuze ko yemera ko abaraperi n’abahanzi muri rusange mu Rwanda bakoresha ibiyobyabwenge. Gusa akongeraho ati “Abahanzi kimwe n’urundi rubyiruko muri rusange, harimo abakoresha ibiyobyabwenge. Ariko njyewe simbikoresha, bibaye ngombwa nakanda amazi(nanywa inzoga)”.

Muri iyi ndirimbo Major-X agira inama urubyiruko arusaba guhagarika gufata ibiyobyabwenge. Agira ati “Mwirinde [kunywa ibiyobyabwenge] kuko nawe murabibona Leta ntabwo ijya ikinaa, irahana n’iyo waba uri umushoramari tugufatiye mu cyaha nawe wurira panda gari, ukajyanwa nk’ibindi bigwari”

Major-X anasaba abagabo bagihohotera abagore babo gucubya ingeso, akanasaba abakora umwuga w’uburaya kuzibukira bagashaka indi mirimo itari ukwigurisha.

Abahanzi nyarwanda bararushaho gusobanukirwa ko ari ijisho rya rubanda. Bamwe batangiye kujya bahimba indirimbo nk’izi zishishikariza urubyiruko na sosiyete muri rusange kwita no gukurikiza gahunda za leta.

Umukwabo by Major - X Ft Bruce Melody: