Ibi bitaramo bimaze imyaka ibiri bitangijwe bisigaye byitabirwa ku buryo bukomeye. Igiheruka cyabaye mu ijoro rya tariki 30 Ugushyingo 2023 ndetse abantu bari babuze aho bicara nyuma y’amezi atatu gusa byimuriwe muri Camp Kigali.

Ni ibitaramo bisigaye byarahawe akazina k’Iseka Rusange bitewe n’uko bihuza benshi kuva ku byamamare kugera ku bakiri bato.

Itsinda ry’Abanyarwenya Gakuba Comedy ni bamwe mu batangarije IGIHE ko bamaze guhindurirwa ubuzima n’ibi bitaramo.

Ni itsinda rigizwe na Ndihokubwayo Jean Bosco (ukina ari Gakuba), Izabayo Bonethe (umwana wa Gakuba) ndetse na Irakoze Betty (ukina ari umugore wa Gakuba).

Aba banyarwenya buri igihe iyo bageze ku rubyiniro amagambo ya Izabayo Bonethe w’imyaka 12 atungura benshi baba bavuga ko ari ay’abantu bakuze.

Iri tsinda ritangaza ko imikino y’urwenya rinyuza kuri Shene ya YouTube, ryatangiye riyafatisha telefoni ariko ubu ryaguze camera igezweho.

Izabayo Bonethe yagize ati “Kuva naza muri Gen-z Comedy, imibereho yanjye yarahindutse, ndi umuntu utandukanye n’uko nari meze, mbasha kwisanzura, isoni zarashize mba nifitiye icyizere ndetse no mu ishuri byarahindutse."

"Ikindi nakubwira ni uko ubu tutagikoresha telefoni mu kwifata amashusho, twaguze camera dusigaye dukoresha ndetse twayiguze mu mafaranga twakuye muri ibi bitaramo.”

Hari igihe bagiye nta tike bafite ibacyura ariko uwo munsi batahanye arenga ibihumbi 150 Frw bahawe n’abantu bishimiye urwenya rwabo.

Ndihokubwayo Jean Bosco yagize ati “Mu cyumweru cyashize, twaje nta tike dufite iducyura, twari twiringiye ko Merci aturwanaho gusa na we warabibonye abantu banyuzwe n’urwenya rwacu wabonye ibyo bakoze, ubu tumeze neza.”

“Uyu mwana dukorana iby’urwenya yabitangiye afite imyaka icyenda, mbere twifataga amashusho tukayashyira kuri TikTok nyuma ni bwo baduhamagaye turaza.”

Izabayo Bonethe wiga mu mwaka wa kane w’amashuri abanza avuga ko iyo agize igitekerezo agisangiza mugenzi we bakungurana ibitekerezo gusa byose bikorwa iyo avuye ku ishuri mu mpera z’icyumweru.

Ndihokubwayo Jean Bosco avuga ko uyu mwana basanzwe baturanye yabonye afite impano yo gusetsa n’uburyo akoresha amagambo ye ahitamo gutangira gukorana na we, ubu ni bamwe mu banyura benshi mu bitabira Gen-z Comedy Show.

Uyu mukobwa muto aba aherekejwe na mukuru we Irakoze Betty, umuba hafi mu bikorwa bye bya buri munsi.

Akubwira ko intego afite ari izo kuba yagera ku rwego rw’abanyarwenya bakomeye mu Rwanda baserukira igihugu.

Umunyarwenya Muhinde na we ni umwe mu bamaze kubaka izina mu bijyanye no gusetsa binyuze muri ibi bitaramo ku buryo rimwe na rimwe hari abamubona akigera ku rubyiniro bagatangira guseka.

Ni umunyarwenya wifashisha indeshyo ye cyangwa imiterere y’abantu bagufi agakuramo inkuru abara mu buryo busekeje.

Mu ijoro ryo ku wa 30 Ugushyingo 2023 yari ku rubyiniro, Prophet Joshua Levoyanto yageze aho amusanga ku rubyiniro aramuremera we n’abandi bakorana.

Mu minsi yashize Titi Brown wari witabiriye ibi bitaramo ku nshuro ya mbere, ubwo yari avuye muri gereza yahawe amafaranga n’abantu batandukanye n’ababyitabiriye mu rwego rwo kumwakira.

MC Nario ashimira Muhinde nyuma yo kunyurwa n'urwenya rwe

Kwifata ntibikorohera iyo wageze ahantu nk'aha hari abanyarwenya barenga 10 bakiri bato ariko bafite impano

Izabayo Bonethe w’imyaka 12 (ukina ari umwana wa Gakuba) amagambo ye atungura benshi mu bitabira Gen-z Comedy

Kaduhire bakunze kwita Kadudu ni umwe mu bakobwa b'abanyarwenya babarizwa muri Gen-z Comedy

Muhinde iyo bamwe bakimubona bahita batangira no guseka ataravuga

Isekerenawe na we amaze kugira abafana benshi binyuze muri ibi bitaramo

Igitungura benshi ni uburyo ibi bitaramo byitabirwa cyane kandi byitabirwa n'abanyarwenya bo mu Rwanda, biganjemo abakizamuka

Ibi bitaramo byongewemo agace kiswe Meet Me Tonight kagira umutumirwa ugira ibyo asangiza abakiri bato cyangwa agasubiza ibyo bamwe bakeneye kumumenyaho

Hashize amezi atatu gusa ibi bitaramo byimuriwe muri Camp Kigali

Clement akoresha inkirigito mu gutera urwenya rwe ahuza n'umuziki

Abagize Gakuba Comedy ni bamwe mu bamaze kubaka izina binyuze muri Gen-z Comedy

Akanyamuneza kaba ari kose ku bitabira Gen-z Comedy

Gen-z Comedy Show iba inshuro ebyiri mu kwezi, bamwe bayise "Iseka Rusange"

Abitabira Gen-z Comedy Show bariyongereye ku buryo na Camp Kigali aho ibi bitaramo bibera hatangiye kuba hato

Urwenya ruba muri Gen-z Comedy Show ntirwatuma wifata

Umunyarwenya Muhinde ni umwe mu bamaze kubaka izina rikomeye binyuze muri ibi bitaramo

Titi Brown yanyuzwe n'urukundo yeretswe acyitabira Gen-z Comedy Show akimara gufungurwa

Ruti Joël yatashye yikanda imbavu

Muyoboke Alex ntajya asiba muri Gen-z Comedy

Ndaruhutse Merci [Fally Merci] anezezwa n'urwego ibi bitaramo yatangije mu myaka ibiri ishize bimaze kumugezaho we na bagenzi be

Amafoto: Gen-Z Comedy