00:00:00 IGIHE NETWORK KN KINYARWANDA EN ENGLISH FR FRANCAIS

Ubushakashatsi bwemeje ko inkingo za AstraZeneca zirinda COVID-19 kimwe n’izakozwe muri mRNA

Yanditswe na IGIHE
Kuya 18 July 2022 saa 03:42
Yasuwe :

Isesengura ryakozwe n’impuguke ryemeje ko inkingo za AstraZeneca zirinda umuntu kuremba cyangwa kwicwa na COVID-19 iyo yahawe ebyiri, mu buryo bumwe n’uwahawe inkingo zikorwa hifashishijwe ikoranabuhanga rya mRNA.

Mu gukora inkingo, hifashishwa uburyo buha umubiri amakuru kuri virus barimo gukingira, ku buryo iyo igeze mu mubiri, uba waramaze kubaka uburyo bwo kuyirwanya.

Mu gukora inkingo za AstraZeneca hakoreshwa virus ifite intege nke cyane (Adenovirus), mu gihe izindi nka Moderna na Pfizer/BioNTech hifashishwamo uburyo bwa Messenger RNA (mRNA).

Uruganda rwa BioNTech rurimo kwifashisha ikoranabuhanga rya mRNA mu gukora inkingo zitandukanye, harimo n’izishobora gukorerwa mu Rwanda mu minsi mike, za COVID-19, Igituntu na malaria.

Ubushakashatsi bushya bwagaragaje ko inkingo za AstraZeneca zitanga ubwirinzi bumwe n’ubw’izakoreshejwe uburyo bwa mRNA, mu kurinda uwanduye COVID-19 kuremba cyangwa kwicwa n’iki cyorezo.

Ni isesengura ryashingiye ku nyigo 79 zakorewe hirya no hino ku isi, ryagaragaje ko buriya bwoko bw’inkingo butanga ubwirinzi bungana mu kurinda umubiri virus ya SARS-Cov-2, "iyo umuntu yahawe urukingo rwa kabiri."

Imibare yakusanyijwe mu bubiko bwa VIEW-hub bubika amakuru ku nkingo, bwa Johns Hopkins Bloomberg School of Public Health na International Vaccine Access Center, yasesenguwe n’inzobere zitandukanye mu bijyanye n’indwara zandura, zo muri Aziya.

Ibyavuye muri ubwo bushakashatsi byaje gutangazwa na Expert Review of Vaccines.

Inyandiko yashyizwe ahagaragara igira iti "Inyigo igaragaza ko inkingo za COVID-19 za AstraZeneca na BNT162b2 na mRNA-1273 zakozwe hifashishijwe mRNA, zitanga urwego rumwe rw’ubwirinzi ku kuremba (91-93%) n’urupfu (91-93%), hatitawe ku myaka."

Imibare yakusanyijwe mu gihe ubwandu bwakwirakwiraga cyane bwari ubwa virus yihinduranyije ya Delta hamwe n’izayibanjirije.

Icyakora, inyigo igaragaza akamaro k’urukingo rwa gatatu rwo gushimangira yakozwe na UK Health Security Agency, igaragaza ko ubwirinzi bukomeza kuba bumwe no kuri virus yihinduranyije ya Omicron.

Umuyobozi wa Oxford Clinical Research Unit muri Vietnam, Prof. Guy Thwaites, akaba n’umwe mu bakoze ubu bushakashatsi, yavuze ko inkingo za COVID-19 zagize uruhare rukomeye mu gutabara ubuzima bw’abaturage, no gutuma ubuzima busubira ku murongo.

Yakomeje ati "Isesengura ryacu ry’inzobere rigaragaza ko urukingo rwa COVID-19 rwa AstraZeneca n’izindi nkingo zihari za mRNA zitanga ubwirinzi bumwe, bwo ku rwego rwo hejuru, kuri COVID-19 ibangamiye ubuzima."

"Aya ni amakuru y’ingenzi ku nzego zifata ibyemezo mu gihe bafata ingamba mu guha abaturage inkingo mu mezi 12 ari imbere."

Umuyobozi w’Ishami rikora inkingo muri AstraZeneca, John L. Perez, yavuze ko ubu bushakashatsi butanga amakuru y’ingezi ku mikorere y’inkingo za COVID-19 , harimo n’iza AstraZeneca.

Yakomeje ati "Dushimishijwe no kuba iyi mibare ikomeje kugaragaza urwego rwo hejuru inkingo zitanga mu bwirinzi ku burwayi bukomeye, ndetse bikarushaho kuzamura imyumvire ku kamaro k’inkingo mu guhashya icyorezo cya COVID-19."

VIEW-hub ishyirwamo amakuru buri cyumweru, ajyanye n’ubushakashatsi bukorwa ku musaruro utangwa n’inkingo.

Imibare igaragaza ko AstraZeneca n’abafatanyabikorwa bayo bamaze gutanga inkingo zisaga miliyari eshatu, mu bihugu birenga 180.

Nibura bibiri bya gatatu by’izi nkingo zatanzwe mu bihugu bikennye n’ibiri mu nzira y’amajyambere.

Iteganyamibare rigenekereza ko izi nkingo nibura zaramiye ubuzima bw’abantu bagera kuri miliyoni 6, hagati ya tariki 8 Ukuboza 2020 na tariki 8 Ukuboza 2021.

Izi nkingo zikorwa hifashishijwe virus yaciwe intege cyane itera ibicurane. Ni uburyo bumaze imyaka isaga 40 bukoreshwa, bwifashishijwe mu guhangana n’indwara z’ibicurane, Zika, Ebola na Virus Itera Sida, HIV.

Uru rukingo rwavumbuwe na Kaminuza ya Oxford yo mu Bwongereza, ariko hari n’izakozwe n’ikigo Serum Institute cyo mu Buhinde.

Inkingo za AstraZeneca zahawe benshi mu Rwanda no ku isi muri rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .