Umufite asanzwe ari umunyamideli wakoranye n’ibigo bikomeye mu Rwanda akaba ari n’umunyamakuru mu kiganiro Isango na Muzika gica ku Isango Star ndetse yabaye igisonga cya kabiri cya Miss supranational Rwanda 2019.

Amahirwe yo gukorana na Elite yaturutse ku marushanwa yo gushaka abanyamideli yakozwe n’ikigo The Hunt cyo muri Côte d’Ivoire ubwo we n’undi musore batsindaga mu bantu 174 bari bitabiriye.

Kubera imikoranire myiza byatumye iki kigo gitangira kwerekana amafoto ye mu bindi bigo bikomeye mpuzamahanga by’abanyamideli nka Viva, IMG Models na Elite ariyo yaje kumuhitamo basinyana amasezerano y’umwaka ashobora kuzongerwa.

Abinyujije ku mbuga nkoranyambaga ze, Umufite yavuze ko anejejwe no kuba ageze ku nzozi ze zo gukorana n’ikigo gikomeye nyuma yo gukura akunda kumurika imideli ariko ababyeyi bakamusaba kubanza kurangiza amashuri.

Elite Model Management yashinzwe mu 1972 ishingirwa mu Bufaransa. Yakoranye n’abanyamideli batandukanye mpuzamahanga nka Diana Penty, Linda Evangelista, Naomi Campbell, Kelly Gale, Özge Ulusoy, Hanne Gaby Odiele, Julia Saner, Olga Puchkova, Erika Lucas n’abandi.

Elite ikorana n’ibigo bitandukanye birimo Channel, Prada, FENDI, Saint Laurent, Calvin Klein, Nespresso n’ibindi bigo bikomeye by’imideli.

Elite Model Management yanyuzwe n'amafoto ya Umufite bituma bamuha amasezerano yo gukorana

Ni ibyishimo bikomeye kuri Umufite ugiye gukorana n'ikigo gikomeye cyo mu Bufaransa

Umufite Anipha asanzwe ari umunyamakuru mu Isango na Muzika

Umufite Anipha yasinye amasezerano y'umwaka muri Elite Model Management

Umufite ni umwe mu banyamideli bakomeye mu Rwanda

Umufite avuga ko yakuze akunda kumurika imideli

Umufite yatangiye kumurika imideli akiri muto aza kuba abihagaritse abanza kurangiza amashuri ye

Umufite yitabiriye Miss Supranational Rwanda 2019