Ni ubufatanye bumaze amezi abiri aho abarimu n’abanyeshuri bo muri iri shuri rya École de Couture du Valais, bari mu Rwanda aho bari bagiye kumara ukwezi bigana n’abo muri ‘Our Sisters’ Opportunity’, mu ishuri ryabo riherereye mu Murenge wa Gakenke, Akarere ka Gakenke.
Abarimu ba École de Couture du Valais bifashisha ibikoresho bigezweho byifashishwa mu mwuga w’ubudozi bugezweho [guhanga imideli] aho mu byo bigishije abo mu Rwanda harimo kudoda ishati ishobora kwambarwa n’abagabo n’abagore.
Aba banyeshuri bamuritse imideli yabo ku mugoroba wo ku wa 11 Kanama 2022, mu birori byiswe ‘Umudozi Fashion Networking Switzerland – Rwanda’ byari byitabiriwe n’abarimo Umuyobozi w’Umujyi wa Kigali, Rubingisa Pudence n’abandi.
Abamuritse imideli barimo abanyeshuri bo muri École de Couture du Valais n’Umuryango Our Sisters’ Opportunity, aho by’umwihariko bamurikaga ishati yambarwa n’ibitsina byombi bakoze bahuriyeho n’indi myambaro bamaze iminsi bakora.
Umuyobozi w’Umushinga ugamije guhuza Abanyarwanda n’Abasuwisi binyuze mu mishanga y’iterambere, Neza Rwanda, Jackie Helfenberger yashimye ubufatanye bukomeje kuranga u Rwanda n’u Busuwisi ahamya ko yifuza gukora ibishoboka byose bukazakomeza kandi bukaguka.
Helfenberger ni we wahuje ishuri rya École de Couture du Valais n’Umuryango Our Sisters’ Opportunity kugira ngo habeho iyo mikoranire igamije gutera inkunga umwuga w’ubudozi bugezweho hano mu Rwanda.
Umuyobozi wa École de Couture du Valais, Gabriela Schnyder, yavuze ko bamaze igihe kinini bakora muri uru rwego rw’ubudozi bugezweho ari nayo mpamvu bashaka gufasha Our Sisters’ Opportunity ndetse n’u Rwanda muri rusange mu bijyanye n’ubwiza bw’ibyo bakora no kubishakira amasoko.
Ati “Tuzakomeza gukorana haba mu kubaha ubumenyi, kubashakira amasoko yo mu Busuwisi no kubafasha kubaka ubushobozi kandi turateganya gukorana n’andi mashuri cyangwa abandi bantu hano mu Rwanda.”
Umuyobozi wa Our Sisters’ Opportunity, Uwamahoro Deliphine, yavuze ko iyi myambaro yamuritswe irimo ishati yambarwa n’ibitsina byombi igiye gukorwa ku bwinshi ikajyanwa ku masoko yo mu Rwanda no mu Busuwisi.
Ati “Izi mwabonye ni izo kumurika, tugiye gukora nyinshi dutangire kuzigurisha mu Rwanda no mu Busuwisi.”
Abanyeshuri bigishwa na Our Sisters’ Opportunity ari nabo bamuritse iyi mideli bagaragaje ko amasomo bahawe mu gihe cy’umwaka yatumye babasha kugira ubumenyi buzabafasha kwiteza imbere.
TANGA IGITEKEREZO
AMATEGEKO AGENGA IYANDIKA RY'IGITEKEREZO CYAWE
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni, Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe. Ibi bidakurikijwe igitekerezo cyanyu gishobora kutagaragara hano cyangwa kigasibwa.
Igitekerezo cyawe kigaragara nyuma y'isuzuma rikorwa na IGIHE.com , Murakoze!