Bill Gates yavuze ko azakomeza kwishyira mu kato kugeza igihe azumva ameze neza cyane.

Mu butumwa yanyujije ku rukuta rwe rwa Twitter, yagize ati "Nanduye COVID-19. Mfite ibimenyetso byoroheje ndetse ndi gukurikirana inama z’abaganga zo kwishyira mu kato kugeza nongeye kumera neza.’’

Yakomeje ati “Nagize amahirwe yo kuba narakingiwe, nkanahabwa urukingo rushimangira. Mfite uburyo buboneye bwo gupimwa no kubona ubuvuzi buboneye.’’

I've tested positive for COVID. I'm experiencing mild symptoms and am following the experts' advice by isolating until I'm healthy again.

— Bill Gates (@BillGates) May 10, 2022

Bill Gates ni umwe mu bakunze kuvuganira abantu benshi ngo bagerwaho n’inkingo ndetse ibihugu bikiri mu nzira y’iterambere bigahabwa ubuvuzi buboneye.

Muri Mutarama 2022, Umuryango Bill and Melinda Gates Foundation watanze miliyari 1.75$ yo kurwanya icyorezo no gukora inkingo za COVID-19.

Mbere ya Noheli y’umwaka ushize, Bill Gates yatangaje ko yasubitse kujya mu biruhuko kubera ikwirakwira rya COVID-19 yihinduranyije yo mu bwoko bwa Omicron yakwirakwiraga bwangu.

Gates Foundation mu Ukwakira 2021 yavuze ko izatanga miliyoni 120$ mu gushyigikira Ikigo gikora imiti cya Merck & Co. kugira ngo bifashe ibihugu biri mu nzira y’iterambere.

Mu ntangiriro za Gicurasi 2022, Umuherwe Bill Gates yavuze ko hakenewe kugira igikorwa ku rwego mpuzamahanga kugira ngo hirindwe ibyorezo bikomeye mu gihe kizaza, anagaragaza ko Covid-19 ishobora kongera kugira ubukana.

Ati “Birambabaza kubona tutabasha guha uburemere iki cyorezo no gukora ishoramari mu izina ry’abatuye Isi bose.”

Uyu mugabo washinze Ikigo Microsoft, yavuze ko hakwiye gushyirwaho Itsinda ry’Inzobere rifite inshingano zo gutanga umusanzu mu kurwanya ibyorezo (Global Epidemic Response and Mobilization initiative: GERM) mu guhangana n’ibibazo byibasira ubuzima bw’abatuye Isi.